उपहार न्यूज
गाईघाट कात्तिक ३०
उदयपुरको वेलका नगरपालिकामा अनियन्त्रीत रुपमा प्राकृतिक दोहान भएको भन्दै दुई दिन देखि स्थानिय नागरिकहरुले सडकमै उत्रेर विरोध गरेका छन् । आफुहरुले स्थानिय खोलाबाट ढुंगा गिटि वालुवा उत्खन्न गर्न नदिन माग राख्दा राख्दै पनि नगरपालिकाले वेवास्ता गरेको भन्दै नागरिकहरु सडकमै उत्रेर विरोध गरेका हुन् ।
शुक्रबार देखि वेलका नगरपालिका ४ स्थित लालबजार क्षेत्र असामान्य छ, स्थानियले दिन र रातभरी टिफरबाट स्थानिय खोलाहरुको ढुंगा अनियन्त्रीत रुपमा दोहन हुन थाले पछि विरोध गरेका हुन् । उनीहरुले शुक्रबार बिहान देखि ढुंगा बोक्दै गरेको २० वटा टिफर नियन्त्रणमा लिएका छन् ।
बेलका नगरपालिका ४ र ६ को सिमानामा रहेको सिसुवा खोलाबाट जोखिम नै निम्तने गरी ढुंगा उत्खनन गरेको भन्दै शुक्रबार बिहान देखि करिब दुई दर्जन ढुंगा बोकेर जादै गरेको टिफर स्थानियहरुले वेलका नगरपालिका ४ लालबजारमा स्थानियले रोकेका हुन् । खोलाबाट प्राकृतिक विपत्तीनै सृजना हुने गरी प्राकृतिक दोहन हुन थाले पछि आफुहरुले यसलाई रोकेको स्थानिय माया वली कोइरालाले बताउनु भयो ।
शुक्रबार दिनभर स्थानियले नियन्त्रणमा लिएको टिफर रातभरी पनि सो स्थानबाट चल्न दिएनन्, आज विहानै (शनिवार) देखि वेलका नगरपालिका ४ लालबजार क्षेत्रमा स्थानिय नागरिकहरुले नारा जुलुस सहित ढुंगा, गिटि, वालुवको टेण्डर रद्ध गर्न माग राख्दै आएका छन् ।
नगरपालिकाले ठेकेदार संगको आन्तरिक मिलेमतोमा जथाभावी खोला, खहरेबाट प्राकृतिक स्रोत साधनको दुरुपयोग बढाएको भन्दै स्थानियले टेण्डर रद्ध गर्न माग राखेको स्थानिय प्रेम अधिकारीले बताए ।
वेलका नगरपालिका क्षेत्रका २१ टोल विकास संस्थाले यस अघिनै स्थानिय वडा नम्बर ४ मा ढुंगा, गिटि नदिन माग राख्दै ज्ञापन पत्र बुझाए पनि त्यसको कुनै सुनुवाई नभएको स्थानिय नागरिकहरुले बताए ।
आफुहरुले राखेको मागलाई नगरपालिकाले वेवास्ता गरे पछि सडकमा उत्रन बाध्य भएको स्थानियहरुले बताए । नगरपालिकाले गत भदौमा जारी टेण्डर मार्फत सिरहाको बीपी कन्स्ट्रक्सनले ३ करोढ ५६ लाख रुपैयाँमा टेण्डर पाएको थियो । यता यस बिषयमा प्रतिक्रिया लिन खोज्दा वेलका नगरपालिकाका नगर प्रमुख दुर्गाकुमार थापाले स्थानिय नागरिकहरुले गरीराखेको अबरोधको बिषयमा आफुलाई केहि पनि जानकारी नभएको प्रतिक्रिया दिए । नागरिकहरुले प्राकृतिक दोहनको बिरोध गरिराख्दा पनि नगर प्रमुख थापाले भने त्यस बिषयमा आफुलाई केहि थाहा नभएको र जानकारी लिने प्रयास गरीरहेका बताउनु भयो ।
प्रमुख प्रशासकीय अधिकृत पुष्कर भट्टराईले आन्दोलनरत नागरिकहरु संग वार्ताको प्रयास भैरहेको बताए । स्थानिय विभिन्न खोलाहरुबाट एक लाख २० हजार घन मिटर निकाल्ने गरी सहमती भएको प्रमुख प्रशासकीय अधिकृत भट्राईले वताउनु भयो । सबै क्षेत्र संग सहमती गरेरै टेण्डर गरिए पनि के कारणले माहोल विग्रियो सो बारे आफुहरु अनविज्ञ रहेको भट्टराईले बताउनु भयो ।
