देवराज राई-
उदयपुर । उदयपुरमा एक कृषकले वीमा बापत २१ लाख बढी रकम प्राप्त गरेका छन् । जिल्लाको रौतामाई गाउँपालिका वडा नम्बर ५ का बाख्रा पालक स्थानीय मानवबहादुर कटुवाललाई पशु वीमा दावीअन्तर्गत सगरमाथा लुम्बिनी इन्स्योरेन्स कम्पनि लिमिटेड गाईघाट शाखाबाट २१ लाख ११ हजार तीन सय ५० रुपैयाँ उपलब्ध गराइएको हो ।
पाँच वर्षयता निरन्तर बाख्रा पालन व्यवसाय गर्दै आएका ‘रौता राकुली कृषि तथा पशुपञ्छी फर्म’का संचालक मानबहादुरको बाख्रा खोरमा आगलागी हुँदा ९६ वटा बोका र पाठी मरेका थिए । रौतामाई ५ का वडाध्यक्ष पाण्डव राईका अनुसार २०७९ फागुन २६ गते राती साढे २ः०० बजे विद्युत सर्ट भई बाख्राको दुई वटा खोरसमेत जलेर पूर्ण रुपमा खरानी भएको थियो ।
लगत्तै सप्रमाण वडाले २०७९ चैत ३ गते घटनास्थलको स्थलगत मुचुल्कासहित सिफारिस गरेको थियो । कम्पनीको तर्फबाट पूरा गर्नुपर्ने कागजी प्रक्रियाहरु सकिएपछि दाबी बराबरकै रकम हस्तान्तरण गरिएको गाईघाट शाखा प्रमुख डिबी कटुवालले जानकारी दिए । १२ लाख ६१ हजार तीन सय ५० रुपैयाँ बोका र पाठीबापत र जलेको दुई वटा गोठबापत आठ लाख ५० हजार गरी एकमुष्ठ दुई चेकबापट सो रकम भुक्तान गरिएको हो ।
कृषक मानबहादुरले व्यवसायिक रुपमै पाल्दै आएको जमुनपारी क्रस पाठी र बोयर क्रस बोका गोठसहित स्वहा भएपछि बीउ पुँजीबिहीन अवस्थामा पुगेका थिए । समयमै वीमा गर्नाले ‘सत्यको धन फर्किएको’ उनले प्रतिक्रिया दिए ।
रौतामाई ५ नम्बर वडाकार्यालयको सभाहलमा एक कार्यक्रमसहित रौतामाई गापा प्रमुख वीरेन्द्रकुमार मगरले पीडितलाई चेक हस्तान्तरण गरेका थिए । वीमाप्रति कृषकलाई उत्प्रेरणा जगाउन सचेतनामूलक अन्तरक्रिया समेत रहेको कार्यक्रममा रौतामाई ५ का वडाध्यक्ष पाण्डव राई, ६ नम्बरका वडाध्यक्ष पृथ्वीकुमार राई, पालिकाका कृषि पशुशाखा प्रमुख चुडाराज थापालगायतको उपस्थिती थियो ।
सो क्रममा बोल्दै पालिका प्रमुख मगरले कृषि व्यवसायमा भइपरी आउने जोखिम बहन र सुरक्षित लगानीका लागि पछिल्लो समय बीमा कार्यक्रम अत्यावश्यक बन्दै गएको बताए ।
