देबराज राई-
उदयपुर, असोज ६ ।
केही दिनअघि पार्टी परित्याग गरी स्वतन्त्र नागरिकको रुपमा जीवन बिताईरहेका समाजसेवी केदार राईले राज्यपक्षबाट अनावश्यक दुःख दिने काम भइरहेको आरोप लगाएका छन् । केही समय नेकपा (बिप्लव समूह)मा आबद्ध रहेका राईले स्वइच्छापूर्वक पार्टी त्यागे पनि आफूलाई काल्पनिक, झुटा मुद्धामा अभियुक्त बनाइ फसाउन खोजिएको आरोप लगाएका हुन् ।
उदयपुर स्थायी घर भएका राईले यही भदौ १३ गते एक विज्ञप्ती जारी गर्दै नेकपा (बिप्लव समूह)मा आफू उप्रान्त कुनै पनि भूमिकामा नरहने घोषणा गरेका थिए । औपचारिक रुपमै पार्टी परित्याग गरी स्वतन्त्र नागरिकको रुपमा जीवनयापनको बाटो रोजेका राईले राज्यबाट आफु पूर्वाग्रहरी ढंगले असुरक्षित महसुस गरीरहेको बताएका छन् । मंगलबार एक विज्ञप्ती जारी गर्दै राईले आफ्नो असुरक्षाबारे सार्वजनिक गरेका हुन् ।
पार्टी कामकै शिलसिलामा प्रहरी गिरफ्तारीमा परेका राई कानुनमा तोकिएबमोजिमको सजाय भुक्तान गरी २०७५ साल पुस ८ गते उदयपुर जिल्ला कारागारबाट मुक्त भएका थिए । त्यसलगत्तै २०७५ साल माघ ३ गते उच्च रक्तचाँपबाट मस्तिष्कघात भएदेखिनै आफू पार्टी कामको क्रियाशीलता नरहेको विज्ञप्तीमा उल्लेख छ । २०७५ माघ ३ अर्थात आफू शारीरिक रुपमा अस्वस्थ्य भएपछि पार्टीको कुनैपनि गतिबिधिमा संलग्न नरहेको भएपनि आफूबिरुद्व राज्यले पूर्वाग्रह र प्रतिशोधयुक्त फौजदारी मुद्धामा तान्न खोजेको भन्दै उनले मुद्धा फिर्ता लिन सरकारलाई आग्रह गरेको छ ।
राईले हाल आफू कुैपनि पार्टीमा नरहेको र आगामी दिनमासमेत समाजसेवी, स्वतन्त्र नागरिकको रुपमा सामाजिक भूमिकामा रहने बताएका छन् । विज्ञप्तीमार्फत राईले नेपालको संविधान २०७२ बाट प्रत्याभूत मौलिक हकलाई राज्यपक्षबाट इमान्दिारिताका साथ पालना गराउन सरोकारवाला सबै निकायलाई आग्रहसमेत गरेका छन् ।
पार्टी परित्यागपछि स्वतन्त्र जीवनमा फर्किएका राई । तस्वीर : केदार राईको फेसबुक वालबाट ।
