उपहार न्यूज
श्रावण २४
अभिनेत्री तथा निर्देशक नीता ढुंगानाको निर्देशनमा तयार भएको चलचित्र ‘पार्वती’ प्रदर्शनको तयारीमा छ। निर्माण पक्षका अनुसार चलचित्र आगामी भदौ १२ गते, २०८३ देखि नेपालभरका चलचित्र हलमा प्रदर्शनमा आउनेछ।
चलचित्रको प्रचारप्रसारलाई तीव्रता दिँदै निर्माण पक्षले ‘पार्वती’को गीत पनि सार्वजनिक गर्ने तयारी गरेको छ। ‘मेरी दिदी’ नामक गीत ओएसआर डिजिटलमार्फत सार्वजनिक गरिने जनाइएको छ। गीत सार्वजनिक गर्ने मिति भने निर्माण पक्षले ‘सोमबार २५ गते’ उल्लेख गरेको छ।
‘पार्वती’ नीता ढुंगानाको निर्देशनमा बन्न लागेको पहिलो फिचर चलचित्र हो। निर्देशकसँगै उनी चलचित्रमा मुख्य भूमिकामा समेत देखिँदैछिन्। चलचित्रको कथा तथा पटकथा ढुंगानाकै रहेको छ भने पटकथा रूपान्तरणको जिम्मेवारी शिवम् अधिकारीले सम्हालेका छन्। चलचित्रमा नीता ढुंगाना, अशोक दर्जी, दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारको अभिनय रहेको छ। विशेषगरी नीता ढुंगाना र अशोक दर्जीको जोडीलाई लिएर दर्शकमाझ चासो देखिएको छ। यी दुईले यसअघि ‘मन बिनाको धन’ चलचित्रमा पनि सँगै काम गरेका थिए।
‘पार्वती’को छायांकन कास्कीको माछापुच्छ्रे गाउँपालिका–१ स्थित मिर्सा गाउँबाट सुरु गरिएको थियो। चलचित्रमा प्राकृतिक तथा ग्रामीण परिवेशलाई विशेष प्राथमिकता दिइएको निर्माण पक्षले जनाएको छ।
चलचित्रको छायांकन सुदीप बरालले गरेका छन् भने सम्पादन साहिल खानको रहेको छ। निर्माण व्यवस्थापन शंकर पाण्डेले सम्हालेका छन्। चलचित्रका निर्माता हरिहर अधिकारी हुन्।
पारिवारिक सम्बन्ध र सामाजिक विषयमा केन्द्रित ‘पार्वती’
‘पार्वती’ले पारिवारिक सम्बन्ध, आत्मीयता, सामाजिक बुझाइ र संघर्षका विषयलाई कथाको केन्द्रमा राखेको छ। विशेष अवस्थासँग जुधिरहेको दाजु–बहिनीको सम्बन्ध तथा त्यस्ता अवस्थाप्रति समाजको दृष्टिकोणलाई चलचित्रले कथाको महत्वपूर्ण पक्षका रूपमा प्रस्तुत गर्ने निर्माण पक्षको भनाइ छ।
महिला निर्देशकको नेतृत्वमा तयार भएको चलचित्र भएकाले पनि ‘पार्वती’ नेपाली चलचित्र क्षेत्रमा चासोको विषय बनेको छ। निर्माण चरणदेखि नै भदौ १२ गतेलाई प्रदर्शन मिति तय गरेको चलचित्रको निर्माण पक्ष अहिले प्रचारप्रसारलाई तीव्र बनाउने तयारीमा जुटेको छ।
दर्शकमाझ पारिवारिक भावना र सामाजिक सन्देश बोकेको कथामार्फत प्रस्तुत हुन लागेको ‘पार्वती’ले प्रदर्शनपछि कस्तो प्रतिक्रिया पाउने हो, त्यो भने भदौ १२ गतेपछि नै थाहा हुनेछ।
